AQSHtıń Awıl xojalıǵı ministrliginiń Ózbekistanda «balalardıń bilim alıwı hám awqatlanıwı ushın» Mak-Govern Doul xalıqaralıq azıq-awqat baǵdarlaması hám Mehribanlıq Korpusı xalıqaralıq mámleketlik emes biyǵárez shólkemi hám Qaraqalpaqstan Respublikası mektepke shekemgi hám mektep bilimlendiriw ministrligi menen birgelikte mentorlıq iskerliginiń nátiyjeliligin hám kásiplik kompetenciyasın asırıw maqsetinde Shomanay rayonı 2-sanlı MShBSh-de 3-faza mentorları arasında «Mehribanlıq Korpusı shólkeminiń mentorı-2025» kórik-tańlawı shólkemlestirildi. Kórik tańlaw shártleri boyınsha, mentorlarǵa óz kásibi menen baylanıslı mashqalalı jaǵdaylardı jarıtıp beriw tapsırma retinde berilgen bolıp, olar sorawlarǵa kásiplik sheberliklerinen kelip shıqqan halda juwap beriwi kerek. Sonday-aq, úyge tapsırma retinde erte sawatlılıq, salamat turmıs tárizi hám gigiena, salamat awqatlanıw komponentlerin ózinde jámlegen halda balalarǵa tálim-tárbiya iskerliginde paydalana alatuǵın kórgizbeli qurallar tayarlap keliw belgilengen edi. Shártlerdi bahalap barıwda Qaraqalpaqstan Respublikası Mektepke shekemgi hám mektep bilimlendiriw ministrliginiń «Mámleketlik jeke sheriklikti raqajlandırıw» sektorı qánigesi Nurjamal Kurbanova, Mehribanlıq Korpusı shólkeminiń balalardıń erte jastan sawatlılıǵın asırıw komponenti qánigesi Klara Urazımbetova hám Shomanay rayonı 2-sanlı MShBSh-degi tájiriybeli pedagoglardan ibarat tóreshiler quramı ádil bahalap bardı. Kórik-tańlaw juwmaǵında hamme qatnasıwshılarǵa Mehribanlıq Korpusı shólkeminiń Nókis qalası aymaqlıq bólimi tárepinen sertifikat hàm estelik sawǵaları tapsırıldı. 
