Qaraqalpaqstan Respublikası Mektepke shekemgi hám mektep bilimlendiriw ministrliginiń májilisler zalında ministr G.Kojabaeva basshılıǵında “Bilimlendiriw tarawında jumısqa qabıl etiwde Korrupciyalıq jınayatlardıń aldın alıwda tańlawlar shólkemlestiriw, ashıq-aydınlıqtı támiyinlew boyınsha is-ilajlar” haqqında ashıq sáwbet ótkerildi.

Ilajǵa ministrdiń orınbasarları, ministrliktiń bólim baslıqları hám rayon(qala)lıq mektepke shekemgi hám mektep bilimlendiriw bólimi baslıqları qatnastı.

Ashıq sáwbette usı jıldıń 18-20-mart kúnleri Ózbekstan Respublikası Korrupciyaǵa qarsı gúresiw agentligi jumısshı toparı tárepinen barlıq tarawlarda Korrupciyalıq jınayatlardıń kelip shıǵıw sebepleri, olardıń aldın alıw ushın alıp barılǵan jumıslar boyınsha sholıw jasaldı hám bilimlendiriw tarawında eń kóp jınayatlar jumısqa qabıl etiwde anıqlanıp atırǵan qáte-kemshiliklerge toqtalıp ótti. Usı kemshiliklerdi saplastırıw boyınsha juwapker xızmetkerler arasında sın kózqaraslı sáwbetlesiw ótkerildi.

Sonday-aq, ministr tárepinen hár qanday Korrupciyalıq jaǵdaylardan alıp shıǵıw boyınsha ashıq-aydınlıqtı támiyinlew, insan faktorın azaytıw hám ilajların islew, hár birimiz bul illetke qarsı gúresiwge juwapker ekenligimizdi eskertip ótti.

Barlıq qala hám rayonlarda jáne olarǵa qaraslı ulıwma bilim beriw mektepleri hám mektepke shekemgi bilimlendiriw shólkemlerde jumısqa qabıl etiw processlerin ashıq-aydınlıqqa ámel etken halda ótkeriw boyınsha tiyisli tapsırmalar berildi.