“Tań juldızı” gazetasınıń redaktorı Feruza Adilova basshılıǵındaǵı jurnalistler toparı Qaraqalpaqstan Respublikasınıń Qońırat rayonında xızmet saparında boldı.

Tańlaw jeńimpazları menen ushırasıw

Xızmet sapar dawamında rayondaǵı 41-sanlı ulıwma orta bilim beriw mektebi hám 39-sanlı ayırım pánlerdi tereńlestirip oqıtılatuǵın klassı bar mektepte oqıwshıları menen ushırastı.
Ushırasıwda gazeta redakciyası tárepinen ótkerilgen “Insan huqıqları-balalar názerinde” hám “Onajonim tabiat” tańlawlarda jeńimpaz bolǵan oqıwshılarǵa diplom hám sawǵalar tapsırıldı. Bul oqıwshı jaslarımız ushın úlken xoshamet bolıp, olar óz bilim hám qábiletlerin jáne de rawajlandırıwǵa túrtki boldı. Tańlawlar tek ǵana oqıwshılardı xoshametlew menen sheklenbesten, al olardıń dóretiwshilik hám intellektuallıq potencialın arttırıwǵa qaratılǵan edi.
Ushırasıwdan soń, oqıwshılar tárepinen tayarlanǵan koncert baǵdarlaması qoyıp berildi. Koncertte jaslardıń kórkem-ónerge bolǵan muhabbatı hám talantı kórsetildi. Olardıń shıǵıwları, muzıkalı ayaq oyınları hám dóretiwshilik jumısları tamashagóylerde úlken tásir qaldırdı.

Sonday-aq, jurnalistler rayondaǵı “Bárkamal áwlad” balalar mektebin barıp kórdi. Mektepte oqıwshılarǵa jaratılǵan zamanagóy sharayatlar hám bilimlendiriw sisteması menen jaqınnan tanıstı. Mektepte sport, kórkem-óner hám ilimiy jumıstı rawajlandırıw ushın barlıq imkaniyatlar bar. Oqıwshılar óz qábiletlerin jáne de jetik rawajlandırıwı ushın zamanagóy texnologiyalar, sport obektleri hám ruwxıy mádeniyat oraylarınan paydalanbaqta.

Jurnalistler toparı tárepinen shólkemlestirilgen sapar Qońırat rayonındaǵı jaslar hám bilimlendiriw mákemelerine úlken itibar qaratılǵanı, jańa áwladtıń intellektuallıq hám ruwxıy jaqtan rawajlanıwına úles qosıw, olardı xoshametlew hám olardıń dóretiwshilik potencialın arttırıwǵa qaratılǵan bunday ilajlar rayon xalqınıń rawajlanıwına úlken tásir kórsetedi.

Jurnalistler tárepinen alınǵan tásirler hám foto kórinisler “Tong yulduzi” gazetasında keńnen sáwlelendiriliwi kútilmekte.