Usı jıldıń 11-aprel kúni mektep oqıwshıları qatnasıwında júz berip atırǵan jol-transport hádiyseleriniń sebeplerin anıqlaw hám olardıń aldın alıw boyınsha ilajlardı belgilew maqsetinde ministrliktiń májilisler zalında áhmiyetli májilis ótkerildi.

Májiliste Qaraqalpaqstan Respublikası mektepke shekemgi hám mektep bilimlendiriw ministriniń orınbasarı M.Shlımbetova, Aralboyı transport prokuraturası prokurorınıń orınbasarı B.Erejepov, Qaraqalpaqstan Respublikası Transportta qáwipsizlikti támiyinlew basqarması huqıqbuzarlıqlar profilaktikası toparı aǵa inspektorı Sh.Urazbaev hám de Qarakalpakstan Respublikası Ishki isler ministrliginiń Jámiyetlik qáwipsizlik xızmeti jol háreketi qáwipsizligi basqarmasınıń aǵa inspektorı leytenant B.Zinelbaev, Nókis qalasındaǵı ulıwma orta bilim beriw mektepleriniń direktorı hám olardıń ruwxıy-aǵartıwshılıq isleri boyınsha orınbasarları, sonday-aq, barlıq rayonlardaǵı ulıwma orta bilim beriw mektepleriniń basshıları hám olardıń ruwxıy-aǵartıwshılıq isleri boyınsha orınbasarları aralıqtan qatnastı.

Májilis dawamında jol háreketi qáwipsizligin támiyinlew, oqıwshılardıń háreketleniw mádeniyatın arttırıw, ata-analar menen birge islesiwdi kúsheytiw, sonday-aq, mektepler átirapında qáwipsiz infrastrukturanı jaratıw boyınsha ámelge asırılıp atırǵan hám ámelge asırılıwı kerek bolǵan ilajlar dodalandı.

Májilis juwmaǵında tiyisli usınıslar islep shıǵıldı hám bul baǵdardaǵı jumıslardı bunnan bılay da jedellestiriw boyınsha juwapkerlerge anıq tapsırmalar berildi.