Qaraqalpaqstan Respublikası Mektepke shekemgi hám mektep bilimlendiriw ministrliginde Qaraqalpaqstan Respublikası sudınıń 2026-jıl 6-yanvardaǵı “Usınısı” tiykarında 2025-jıldıń juwmaqları hám bilimlendiriw sistemasında korrupciyalıq jınayatlardıń aldın alıw máselelerine baǵıshlanǵan ashıq sáwbet shólkemlestirildi. Ilajda Qaraqalpaqstan Respublikası Mektepke shekemgi hám mektep bilimlendiriw ministri G.Kojabaeva, ministrdiń orınbasarları Q.Ismayılov, M.Shlimbetova, Qaraqalpaqstan Respublikası prokurorınıń úlken járdemshisi, birinshi dárejeli yurist B.Agitaev, sonday-aq, ministrlik sistemasındaǵı barlıq rayon (qala) lıq bólimleriniń basshıları, xızmetkerleri, ulıwma bilim beriw mektepleri hám mektepke shekemgi bilimlendiriw shólkemleriniń direktorları qatnastı. Ilaj ZOOM platforması arqalı 16 rayon (qala) lıq studiyalardan jalǵanıp, jámi 1300 ge shamalas, sonnan 842 taraw xızmetkeri qamtıp alındı. Ashıq sáwbette ministr G.Kojabaeva ashıp berip, korrupciyaǵa qarsı gúresiw búgingi kúnde mámleketlik siyasat dárejesindegi áhmiyetli másele ekenin atap ótti. Bilimlendiriw sistemasında jumıs alıp barıp atırǵan hár bir xızmetker korrupciyaǵa mawasasız múnásibette bolıwı, bul illetke qarsı gúresiwde jeke juwapkershilik hám úlgi kórsetiwi zárúr ekenligi atap ótildi. 2025-jıl dawamında sistemada anıqlanǵan korrupciya jınayatları, byudjet qarjılarınıń talan-taraj etiliwi, lawazım wákilliginen paydalanıw jaǵdayları sın kózqarastan dodalandı. Sonday-aq, korrupciyanıń aldın alıw maqsetinde engizilgen sanlastırılǵan hám ashıq-aydın mexanizmler haqqında toqtap ótildi: – jumısqa qabıl etiw processleriniń argos.uz arqalı ámelge asırılıwı; – 1-klassqa qabıllaw hám basqa da processlerdiń elektron sistema arqalı ótkeriliwi; – pedagog kadrlardı attestaciyadan ótkeriwde face-baqlaw, foto hám videobaqlaw sistemalarınan paydalanılıwı; -satıp alıw processleriniń tolıq elektronlastırılıwı. Bul ilajlar insan faktorınıń aralasıwın azaytıwda úlken áhmiyetke iye ekeni ayrıqsha atap ótildi. Bunnan soń Qaraqalpaqstan Respublikası prokurorınıń aǵa járdemshisi B.Agitaev shıǵıp sóylep, sistemada anıqlanǵan jınayıy jaǵdaylar, juwapkershilik ilajları hám ayırım aymaqlarda mápler soqlıǵısıwı menen baylanıslı jaǵdaylar boyınsha bayanat jasadı. Ministrlik tárepinen ótkerilgen deklaraciyalaw processleri arqalı anıqlanǵan kemshilikler saplastırılǵanı atap ótildi. Juwmaǵında ministrliktiń korrupciyaǵa qarsı gúresiw bóliminiń xızmetkeri Sh.Babanazarova Sudtıń usınısı menen tanıstırıp, sistemada jeke máplerdi gózlep jumıs alıp barıwǵa jol qoyılmaytuǵının, hár qanday nızambuzıwshılıq jazasız qalmaytuǵının hám monitoring jumısları izbe-iz dawam ettiriletuǵının atap ótti. Bul ashıq sáwbette bilimlendiriw sistemasında nızam ústinligin támiyinlew, ashıq-aydınlıqtı jáne de kúsheytiw hám korrupciyaǵa qarsı gúresiwde barlıq dárejedegi basshı hám xızmetkerlerdiń jeke juwapkershiligin arttırıwda úlken áhmiyetke iye boldı. Ilaj dawamında bildirilgen pikir-usınıslar tiykarında sistemada anıqlanǵan kemshiliklerdi saplastırıw, profilaktikalıq ilajlardı kúsheytiw hám bunday unamsız jaǵdaylarǵa jol qoymaw boyınsha tiyisli juwmaqlar islendi. Keleshekte de bilimlendiriw tarawında hadallıq, ashıq-aydınlıq hám ádillik principlerine qatań ámel etiw, korrupciyaǵa múnásibetti qáliplestiriw hám jámiyetlik qadaǵalawdı kúsheytiw boyınsha jumıslar izbe-iz dawam ettiriledi. 
