Usı jıldıń 16-aprel kúni Kegeyli hám Shımbay rayonlarında bilimlendiriw sistemasındaǵı korrupciyalıq jınayatlardıń kóbeyip baratırǵanı boyınsha sın kózqarastan talqılaw májilisi bolıp ótti.

Bul májiliske Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva basshılıq etti. Ilajda ministrliktiń Korrupciyaǵa qarsı gúresiw boyınsha bas qánigesi Shaxnoza Babanazarova, rayon prokurorlarınıń járdemshileri, ishki isler bólimi xızmetkerleri hám basqa da juwapkerler qatnastı.

Ilajda bilimlendiriw tarawında anıqlanǵan korrupciyalıq jınayatlar, olardıń kelip shıǵıw sebepleri hám aqıbetleri hár tárepleme analız etildi. Atap aytqanda, Nókis rayonındaǵı «Bárkamal áwlad balalar mektebi»nde júz bergen jınayat jaǵdayı tiykarında korrupciyalıq faktorlar keń jámiyetshiliktiń qatnasıwında kórip shıǵıldı.

Májilis dawamında hár qanday nızam buzılıw jaǵdayınıń aldın alıwda birinshi basshınıń tikkeley juwapkershiligi esletip ótildi. «Mápler soqlıǵısıwı haqqında»ǵı Nızamnıń mazmunı, onı ámelde qollanıw tártibi hám bunday jaǵdaylardı saplastırıw ilajları boyınsha túsinikler berildi.

Bunday ilajlar bilimlendiriw sistemasında ashıq-aydınlıq hám hadallıq principlerin bekkemlew, korrupciyalıq jaǵdaylardıń aldın alıw jáne isenimli ortalıqtı qáliplestiriwge qaratılǵan áhmiyetli ámeliy qádem sıpatında bahalanbaqta.

QR Mektepke shekemgi hám mektep bilimlendiriw ministrliginiń Málimleme xızmeti