Nókis rayonı bilimlendiriw tarawı wákilleri tariyxıy orınlarǵa sayaxat etti

Ruwxıy-aǵartıwshılıq jumıslarınıń nátiyjeliligin arttırıw hám ishki turizmdi rawajlandırıw maqsetinde Nókis rayonı mektepke shekemgi hám mektep bilimlendiriw bólimi xızmetkerleri, ulıwma orta bilim beriw mektepleri hám mektepke shekemgi bilimlendiriw shólkem direktorları, sonday-aq direktor orınbasarları ushın sayaxat shólkemlestirildi.

Dáslep ilaj qatnasıwshıları Ózbekstan Islam civilizaciyası orayında boldı. Qatnasıwshılar bul zamanagóy ilim-aǵartıwshılıq orayında jámlengen siyrek ushırasatuǵın tariyxıy eksponatlar menen jaqınnan tanıstı. Olar elimizden jetisip shıqqan ullı oyshıllardıń ómiri hám jumısı, dúnya civilizaciyasınıń rawajlanıwına qosqan sheksiz úlesi, bay ilimiy miyrası jáne milliy mádeniyatımızdıń ásirler dawamında jetilisip kiyatırǵan úlgileri haqqında tolıq maǵlıwmatlarǵa iye boldı.

Sonday-aq, mákeme basshıları Repressiya qurbanları esteligi mámleketlik muzeyine barıp, xalqımız basınan ótkergen mashaqatlı hám sınaqlı tariyxıy dáwirler haqqındaǵı hújjetler, eksponatlar hám prezentaciyalar menen tanıstı.

Bul sayaxat qatnasıwshılarda Watan tariyxına húrmetti, milliy ózlikti ańlaw sezimin jáne mádeniy miyrasımızdı asıraw menen birge, ruwxıy-aǵartıwshılıq jumıslarınıń sapasın jáne nátiyjeliligin arttırıwǵa úles qostı.