“Suw hám bilimlendiriw”: suwdı únemlew mádeniyatı balalıqtan baslanadı

Qaraqalpaqstanda mektep oqıwshıları arasında suw resurslarınan únemli paydalanıw, qorshaǵan ortalıqqa juwapkershilikli múnásibetti qáliplestiriw hám gigienaǵa baylanıslı paydalı ádetlerdi rawajlandırıwǵa qaratılǵan “Suw hám bilimlendiriw” joybarı ámelge asırılmaqta.

Qaraqalpaqstan Respublikası Mektepke shekemgi hám mektep bilimlendiriwi ministrligi bir neshe jıldan berli UNICEF penen birgelikte bilimlendiriw tarawında bir qatar qospa joybarlardı ámelge asırıp kelmekte. “Suw hám bilimlendiriw” joybarı da usı birge islesiwdiń dawamı bolıp, jas áwladtıń ekologiyalıq bilim hám kónlikpelerin arttırıwǵa xızmet etedi.

Joybar sheńberinde Nókis qalasındaǵı Aralboyı regionı xalıqaralıq innovaciya orayında bes kúnlik seminar-trening shólkemlestirilmekte.

Onda Nókis qalası, Qanlıkól, Shomanay, Qońırat hám Moynaq rayonlarınan 100 muǵallim hám 20 mektep administraciyasınıń wákilleri qatnaspaqta.

Bul joybar Franciya rawajlanıw agentligi (Agence Franchaise de Développement) járdeminde Ózbekstan hám Qazaqstan Respublikasında tájiriybe-sınaq joybarı sıpatında ámelge asırılmaqta.

Seminar dawamında muǵallimler suwdıń qádirin balalarǵa erte jastan túsindiriw, suw resurslarınan aqılǵa uǵras paydalanıw, gigiena hám ekologiyalıq juwapkershilik temaların sabaq processinde qızıqlı hám túsinikli tárizde sáwlelendiriw usılların úyrenbekte.

Joybar sheńberinde ZN Standard JShJ járdeminde oqıwshılar ushın arnawlı oqıw materialları da tayarlandı. Bul materiallar baslawısh hám joqarı klass oqıwshılarına mólsherlengen bolıp, olarda suwdı únemlew, gigiena, suwdan aqılǵa uǵras paydalanıw hám kúndelikli turmısta ekologiyalıq juwapkershilikti arttırıwǵa baylanıslı ámeliy temalar qamtıp alınǵan.

Joybar nátiyjesinde oqıwshılar arasında suwdı únemlew, ılay suwlarınan ekilemshi maqsetlerde paydalanıw, jeke hám jámiyetlik gigienaǵa itibarlı bolıw sıyaqlı paydalı ádetlerdi qáliplestiriw názerde tutılǵan.