Ilajǵa Qaraqalpaqstan Respublikası Mektepke shekemgi hám mektep bilimlendiriw ministriniń birinshi orınbasarı A.Dauletbaev, Respublikalıq bilimlendiriw orayınıń direktorı Q.Jubanov tiykarǵı pánler olimpiadasında jeńimpaz bolǵan oqıwshılar hám olardıń ustazları, ǵalaba xabar quralları qatnastı.

Ashıq sáwbette ministr birinshi orınbasarı sózge shıǵıp, ótken jılǵı ótkerilgen tiykarǵı pánler olimpiadası haqqında tolıq maǵlıwmat berdi.

2024-jıldıń 21-25-oktyabr kúnleri aralıǵında 17 pánnen ótkerilgen tiykarǵı pán olimpiadasınıń ekinshi rayon (qala)lıq basqıshına mámleketlik hám mámleketlik emes  ulıwma orta bilim beriw mektepleri, kásip-óner mektepleri hám Qánigelestirilgen bilimlendiriw mákemelerine qaraslı qánigelestirilgen mektepleriniń 9-klaslarınan 11 185, 10-klaslarınan 9832, 11-klaslarınan 9364 oqıwshı, jámi 30381 oqıwshı óz bilimlerin sınaqtan ótkerdi.

Olimpiada juwmaǵında 9-klaslarda 738 oqıwshı, 10-klaslarda 735 oqıwshı, 11-klaslarda 733 oqıwshı, jámi 2206 oqıwshı jeńimpaz dep tabıldı hám Qaraqalpaqstan Respublikası basqıshına jollama berildi.

Tiykarǵı pán olimpiadasınıń úshinshi Qaraqalpaqstan Respublikası basqıshı 2024-jıldıń 25-noyabr – 4-dekabr kúnleri aralıǵında Nókis qalası 24-sanlı ulıwma orta bilim beriw mektebinde ótkerildi.

Olimpiadanıń úshinshi basqıshın joqarı dárejede shólkemleskenlik penen ótkeriw maqsetinde ministrliktiń shólkemlestiriw komiteti quramı tastıyıqlandı, pánler hám klaslar kesiminde oqıwshılardıń hám olardıń jumısların bahalaw ushın tóreshiler quramı aǵzalarınıń dizimleri qáliplestirilmekte.  Sonday-aq,  ata-analar hám muǵallimlerdiń olimpiada processiniń barısın sociallıq tarmaqlarda janlı baqlap barıw ushın Youtube kanalında  tuwrıdan-tuwrı onlayn baqlap barıldı.

Olimpiadaǵa 17 pán baǵdarı boyınsha 9-klastan 787 oqıwshı, 10-klastan 896 oqıwshı, 11-klastan 866 oqıwshıdan jámi  2549 oqıwshı belsene qatnasıp,  olimpiada juwmaǵında  9-klastan 51, 10-klastan 51, 11-klastan 51 oqıwshıdan jámi 153 oqıwshı jeńimpaz dep tabıldı. 2024-jıldıń 13-dekabr Nókis qalası Temurbekler mektebi áskeriy akademiyalıq liceyinde jeńimpaz oqıwshılar hám olardıń ustazlarına ministrlik tárepinen tayarlanǵan diplom hám húrmet jarlıqları, sonday-aq, jeńimpaz oqıwshılarǵa belgilengen tártipte 1-orın ushın – 2 million 250 mıń swm, 2-orın ushın – 1 million 500 mıń swm, 3-orın ushın – 1 million 125 mıń swm bir mártelik pullı sıylıqları tapsırıldı.

11-klass oqıwshılarınan 48 oqıwshı 2025-jıldıń mart ayında ótkeriletuǵın olimpiadanıń respublikalıq juwmaqlawshı basqıshına qatnasadı.

Ilaj qatnasıwshıları ózleri qızıqtırǵan sorawlarına tiyisli wákillerden juwaplar aldı.